Pagkabahala Buhat ng Nakaraan

Sa gitna ng mga bagong pangambang sumisilay sa buong mundo, muling nabuhay ang mga katanungang, ‘Ito ba ang bagong COVID-19?,’ ‘Magkakaroon ba muli ng lockdown?’ Subalit, nilinaw ni Hans Kluge, opisyales ng World Health Organization (WHO), na hindi ito ang kaso pagdating sa monkeypox o mpox.


𝘐𝘯𝘪𝘭𝘢𝘱𝘢𝘵 𝘯𝘪: 𝘚𝘰𝘱𝘩𝘪𝘢 𝘙𝘦𝘯𝘢𝘶𝘥 𝘙. 𝘚𝘢𝘤𝘳𝘪𝘻, 𝘐𝘨𝘪𝘯𝘶𝘩𝘪𝘵 𝘯𝘪: 𝘈𝘣𝘳𝘪𝘦𝘭 𝘓. 𝘉𝘢𝘭𝘦𝘢𝘯

Ang monkeypox o kilala rin sa tawag na ‘‘mpox’’ ay nagmula sa bansang Africa. Ang nasabing sakit ay hindi nabigyan ng agarang pansin kaya ito’y nagresulta ng global outbreak noong 2022 at ngayong muli na namang nagsisimulang kumalat. Ang mpox ay isa sa mga orthopoxviruses na nagmula sa pamilyang poxviridae at ito ay may dalawang uri, ang Clade I at Clade II. Ang Clade I ay mas nakahahawa at nagdudulot ng malalang sakit na maaaring maging sanhi ng kamatayan. Samantala, ang Clade II naman ay may mas mababang antas ng panganib.

Nitong ika-26 ng Agosto, nakapagtala ang Department of Health (DOH) ng dalawang panibagong kumpirmadong kaso ng monkeypox sa Pilipinas—ang pangatlo ngayong 2024. Ang dalawang kumpirmadong kaso ng mpox ay kapwa nagpositibo sa Clade II.

Bilang tugon, naglabas ng abiso ang WHO na ngayon ang tamang oras para kumilos upang maiwasang muli ang nangyari noon lalo na’t nakakabahala ang biglaang pagtaas ng kaso nito sa mga bansa sa Africa at ang biglaang pagsulpot nito sa mga karatig na kontinente. Ang mga pangamba at alaala ng nakalipas na pandemya ay dapat magsilbing aral, hindi bilang sanhi ng takot. Sa halip, buksan natin ang ating mga isipan sa pangangalap ng mga impormasyon upang masiguro ang kaligtasan ng bawat isa.

𝘐𝘴𝘪𝘯𝘶𝘭𝘢𝘵 𝘯𝘪: 𝘛𝘩𝘰𝘮𝘢𝘴 𝘕𝘪𝘯̃𝘰 𝘑𝘰𝘢𝘲𝘶𝘪𝘯 𝘚. 𝘈𝘳𝘦𝘯𝘢𝘭
𝘛𝘢𝘨𝘢-𝘸𝘢𝘴𝘵𝘰 𝘯𝘨 𝘴𝘪𝘱𝘪: 𝘍𝘪𝘰𝘯𝘯𝘢 𝘔𝘢𝘳𝘪𝘦 𝘎. 𝘉𝘢𝘤𝘰𝘮𝘰 𝘢𝘵 𝘊𝘭𝘢𝘳𝘦𝘯𝘤𝘦 𝘔. 𝘛𝘦𝘮𝘱𝘭𝘰𝘯𝘶𝘦𝘷𝘰